«Տանը մնացած» լինելու ոչ պաշտոնական «կոչումը» կանայք ստանում են կյանքի տարբեր էտապներում, տարեց բարեկամների շրջանում այն ամրապնդվում է, երբ աղջիկը հատում է 30-ի սահմանը: «Բա չե՞ս ամուսնանում» հարցադրումը, որը սերտաճում է «տանը մնացած» լինելու «տիտղոսին», շատերիս նյարդայինացնում է, երբեմն, բարկացնում, բայց հեշտ լուծում միշտ կա: Խոսքը ոչ թե ամուսնանալու, այլ թեմային հումորով վերաբերվելու մասին է:
Դերասանուհի Թամարա Պետրոսյանը ևս նախապատվությունը տվել է հումորին: Tert.am Life-ը ներկա է եղել Թամարայի «Տանը մնացի՞» մոնոներկայացման պրեմիերային, զրուցել դերասանուհու հետ և առանձնացրել հետաքրքիր դրվագները:
Բեմին խորհրդանշական ճամպրուկներ են՝ Թամարայի «օժիտը», սակայն դերասանուհին սրտնեղեց, որ անգամ օժիտի առատությունն իրեն չի օգնում: Ամուսնության թեմային, կյանքում պատահած հնարավոր ամուսինների զվարճալի պատմություններին զուգահեռ Թամարան անդրադառնում էր նաև այլ հարցերի: Ներկայացման ռեժիսորը Սեդրակ Գոջամանյանն է, սցենարի հեղիկնակը Թելման Առաքելյանն է: վերջինս այն կառուցել է Թամարայի պատմությունների հիման վրա:
Մի քիչ պար, մի քիչ երգ, վերջում՝ տարոսիկներ: 33-ամյա դերասանուհին բեմից հայտարարեց, որ «կույս մնալու նուրբ արվեստը» կամ «կույս մնալու 50 երանգները» թեմայով հոգեբանական ակումբ է ստեղծելու, ապա վճռական հայտարարեց՝ «ես ամուսնանալու եմ»:
Բեմ բարձրանալու համար Թամարան ընտրել էր ջինսային հագուստ՝ սպորտային կոշիկների համադրությամբ: Լրագրողների հետ զրույցում դերասանուհին ասաց, որ հարմարավետության կողմնակից է, ընտրել է կերպար, որը և՛ մոտ կլինի պոստերի լուսանկարին, և՛ իրեն ազատ շարժվելու հնարավորություն կտա:
Ներկայացման ավարտին մոտ հումորն ու աշխուժությունը մի պահ դադարեցին: Դերասանուհին ճամպրուկներից մեկից վերցրեց ընտանեկան ալբոմն ու թերթելով հիշեց Արցախում անցկացրած մանկությունը: Այս մասին խոսելիս հնարավոր չեղավ շրջանցել պատերազմը: Այնուհետև վերադառնալով հումորին՝ Թամարան շարունակեց խոսել ոչ թե տանը մնալու, այլ ուրիշ թեմաների մասին:
Ներկայացման ընթացքում նա հումորով անդրադարձավ նաև այնպիսի թեմաների, ինչպիսիք են կանանց հանդեպ բռնությունն ու անտուն կենդանիների պաշտպանությունը: Tert.am Life-ը Թամարայից հետաքրքրվեց՝ ռիսկային չէ՞ր նման թեմաները հումորային պրիզմայով անցկացնելը:
«Մտավախություններ չեն եղել, որովհետև դա իմ անձնական վերաբերմունքն է այդ ամենին: Երբ հոլիվուդյան աստղերը սկսեցին հայտնի պրոդյուսերին մեղադրել բռնության մեջ, ինձ համար զավեշտալի էր: Զավեշտալի էր ոչ թե բռնաբարության, այլ հետին ամսաթվի փաստը, որովհետև հիմա իրենք արդեն կայացած են, ինչ-որ բարձունքների են հասել: Այն, որ նման կշիռի կանայք այդ ամենից սկսել են խոսել տարիներ անց, ինձ համար մի քիչ տարօրինակ էր: Ես քննադատում եմ ցանկացած բռնություն, առհասարակ, խաղաղասեր եմ՝ կողմնակից եմ խոսքի, ոչ ֆիզիկականի ուժի ազդեցությամբ արդյունքի հասնելու»,- ասաց նա:
Ինչ վերաբերում է կենդանիների պաշտպանության հարցին՝ Թամարան հեգնում է կենդանասեր նախկին ընկերոջը: Ի պատասխան մեր հարցադրմանը՝ դերասանուհին շտապեց պարզաբանել, որ ինքն էլ է կենդանասեր, պարզապես կարծում է, որ պետք է լուծումներ գտնել, ոչ թե միայն խոսել․ «Լավ է, երբ մարդիկ ասում են թափառական կենդանիներին վատ մի վերաբերվեք, բայց նրանց համար պետք է կացարաններ կառուցեն, որտեղ կպահեն, կսրսկեն, կկերակրեն, որպեսզի այդ կենդանիները չհարձակվեն մարդկանց վրա»:
Թամարան, խոսելով ներկայացումից առաջ և հետո իր զգացողությունների մասին, ասաց, որ մի փոքր առողջական խնդիրներ է ունեցել. «Երբ հիվանդանում եմ, առաջինն այն ազդում է ձայնիս վրա, այդ առումով ինձ մոտ խուճապ կար: Ներկայացումից երկու ժամ առաջ եկավ սթրեսը, չէի էլ զգում՝ ջերմություն ունե՞մ, թե՞ ոչ: Չեմ սիրում հանձնվել. կհանձնվեմ և կպարտվեմ միայն այն դեպքում, եթե դա ինձ հետո կրկնակի հաղթանակ է բերելու»:
