2․5 ժամ Գորիսի ոստիկանության բաժանմունքում գտնվելուց հետո «Ադեկվադ» կուսակցության բերման ենթարկված անդամներն ազատ են արձակվել։ Այս մասին «Ադեկվադ» ՀԿ-ն գրել է ֆեյսբուքյան իր էջում` պարզաբանելով, որ ոստիկանությունը գործել է ահազանգի հետքերով:
«Ինչպես պարզվեց, ոստիկանությունը գործել է ինչ-որ ահազանգի հետքերով, ահազանգողը տեղեկացրել է, որ նկատել է մեքենայով ընթացող «մորուքով և սև շապիկներով անձանց», ինչն էլ հանդիսացել է ոստիկանական գործողությունների հիմք։
Ցավում ենք, որ իշխանությունների ապիկար կառավարման և խուճապային հրահանգավորումների հետևանքով այնպիսի լուրջ կառույցի աշխատանքը, ինչպիսին է ոստիկանությունը, զավեշտի է վերածվում և վարկաբեկվում է իրավապահ մարմինների համբավն ու գործառույթները»,- գրված է հայտարարությունում։
Հիշեցնենք, որ այսօր «Ադեկվադ» շարժման հիմնադիրները մեկնում էին Կապան` մարզային այցի շրջանակում իրենց աջակիցների ու համակիրների հետ հանդիպման նպատակով, սակայն Գորիսի ոստիկանությունը նրանցից մի քանիսին հրավիրել էր բաժին` առանց բացատրության։
Աղբյուր՝ tert.am
