Համեմունք, որոնք կօգնեն կանխել գրիպն ու մրսածությունը

Աշնանը գրիպի ու մրսածության վիրուսներն ավելի տարածված են լինում, ուստի մարդիկ հաճախ են հիվանդանում, սակայն մասնագետները վստահ են, որ ճիշտ մթերքի գործածության դեպքում այս խնդրից կարելի է խուսափել: Հետազոտությունները ցույց են տվել, որ կան համեմունքներ, որոնք ոչ միայն համեղ են, այլև շատ օգտակար, քանի որ օգնում են ամրապնդել իմունային համակարգն ու պայքարել վարակների դեմ: Ձեր ուշադրությանն ենք ներկայացնում դրանցից ամենաարդյունավետները:

Կոճապղպեղ

Կոճապղպեղն օժտված է վառ արտահայտված հակաբորբոքային, խորխաբեր, հակամանրէային ու մրսածությունը բուժող ազդեցությամբ: Բացի այդ, այն ամրապնդում է իմունային համակարգը, մաքրում է քիթըմպանը կուտակված լորձից և ազատում է քթի փակվածությունից: Այս համեմունքը պարունակում է հսկայական քանակությամբ վիտամիններ ու հանքանյութեր, այդ թվում՝ A, С, B1, B2 վիտամիններ, մագնեզիում, ֆոսֆոր, երկաթ, կալցիում, նատրիում, ցինկ և կալիում: Իր յուրահատուկ բաղադրության շնորհիվ կոճապղպեղը կարող է կիրառվել ինչպես հիվանդությունների կանխարգելման համար, այնպես էլ որպես հավելում հիմնական բուժմանը: Այն կարելի է ավելացնել ինչպես թեյին ու սուրճին, այնպես էլ սոուսներին և բանջարեղենով, մսով ու ձկով պատրաստվող ուտեստներին:

Քրքում

Այս համեմունքի ակտիվ բաղադրիչը քրքումինն է, որն օժտված է հակաբորբոքային հատկություններով և արդյունավետ կերպով մեղմում է մրսածության սկզբնական փուլի ախտանշանները: Բացի այդ քրքումինն օժտված է իմունախթան հատկություններով, ինչի շնորհիվ ակտիվացնում է իմունային բջիջների աշխատանքն ու արագացնում օրգանիզմում հիվանդության հարուցչի հայտնաբերման ու ոչնչացման գործընթացը: Մրսածության դեմ լավագույն ժողովրդական միջոցներից է քրքումով տաք կաթը, որը մասնագետները խորհուրդ են տալիս խմել քնելուց առաջ:

Հազրեվարդ

Այս բույսը հզոր հակաօքսիդանտ է, որը պայքարում է բորբոքային գործընթացների դեմ: Հազրեվարդի գործածությունն ամրապնդում է իմունային համակարգն ու պաշտպանում է մրսածությունից ու այլ վարակներից: Թարմ վիճակում օգտագործելու դեպքում մասնագետները խորհուրդ են տալիս օրական 4-6 գրամ հազրեվարդ օգտագործել, մինչդեռ չորացրած վիճակում ընդամենը 2-3 պտղունցը բավական կլինի իմունային համակարգի ամրապնդման համար:

Սխտոր

Սխտորի գործածությունը նպաստում է արյան սպիտակ բջիջների արտադրմանը, իսկ այդ բջիջները ոչնչացնում են վիրուսներն ու բակտերիաները: Բացի այդ, սխտորը պարունակում է ալիցին, որը բնական հակաբիոտիկ է: Սակայն հարկ է հիշել, որ սխտորը ջերմային մշակման ենթարկելու դեպքում դրանում պարունակվող ալիցինը տարրալուծվում է, ուստի այս մթերքը հարկավոր է ուտել հում վիճակում կամ հնարավորինս քիչ ջերմային մշակման ենթարկած:

Չիլի պղպեղ

Այս պղպեղը պարունակում է կապսաիցին, որն ակտիվացնում է իմունային համակարգի բջիջների աշխատանքը: Բացի այդ, այն հարուստ է առողջական վիճակն ամրապնդող օգտակար նյութերով ու վիտամիններով, այդ թվում կարոտինով, մագնեզիումով, վիտամին C-ով, թիամինով (վիտամին B1), ռիբոֆլավինով (վիտամին B2), նիացինով (վիտամին B3) ու ֆոլաթթվով (վիտամին B9):

Նյութի աղբյուր

ՀԱՎԱՆԵՑԻՔ ՆՅՈՒԹԸ? ԿԻՍՎԵՔ ՁԵՐ ԸՆԿԵՐՆԵՐԻ ՀԵՏ
NEWS GOOD TIME
Яндекс.Метрика