Ես իսկապես վարչապետ Նիկոլ Փաշինյանի և Արցախի նախագահ Բակո Սահակյանի վիճաբանության մեջ խնդիր եմ տեսնում: Tert.am-ի հետ զրույցում նման դիտարկում արեց «Հանրապետություն» կուսակցության առաջնորդ Արամ Սարգսյանը՝ խոսելով Հայաստան-Արցախ հարաբերություններում տեղի ունեցող վերջին զարգացումների վերաբերյալ:
«Ինչո՞ւ-ն բազմաթիվ է՝ սկսած տարիքային խնդիրներից: Նույնիսկ ծնողների և զավակների միջև խնդիրներ կան, հայրերի և որդիների միջև խնդիրներ կան, սերունդների խնդիր կա,- ասաց նա՝ նշելով, որ այդ առումով էլ Բակո Սահակյանի և Նիկոլ Փաշինյանի միջև խնդիրները մարդկային են,-ընդհանուր ընկերներ կան, անցած ճանապարհ կա: Այդ անցած ճանապարհում ճիշտ և սխալ արված քայլեր կան: Նոր եկած իշխանությունը նոր է քայլեր անում և սխալներ չունի: Տա Աստված, որ սխալ չունենա: Բայց դա շատ բարդ է»:
Ըստ Արամ Սարգսյանի՝ ղարաբաղյան իշխանությունները երկար ճանապարհ են անցել, անցել են բազմաթիվ փորձությունների միջով, և այդ առումով սխալներ արած կլինեն:
«Ու պետք չէ դրանք երես տալով խնդիրներ լուծել: Պետք չէ տարիքային բաժանում անել, Հայաստան-Ղարաբաղ բաժանում անել, հեղափոխություն և Արցախյան հերոսամարտ բաժանումներ անել»,- ասաց նա՝ նշելով, որ այդ հակադրությունները օգտակար չեն մեզ համար:
Արամ Սարգսյանը նկատեց, որ Բակո Սահակյանի թիմակիցները համարում են, որ Նիկոլ Փաշինյանն անփորձ է, և դա ցուցադրում են: «Բակո Սահակյանը պետք է թիմում այնպիսի մթնոլորտ ստեղծի, որ այդ խնդիրներն ընդհանրապես թիմը չտեսնի:
Հավատացեք, նախկինում էլ է եղել Հայաստանի և Ղարաբաղի մոտեցումների տարբերություն: Այդ մոտեցումները բուռն վեճերի առիթ են դարձել, բայց հանրային դաշտ չեն տեղափոխվել: Հավատացեք, որ «դավադրություն», «հողեր ծախել», «իշխանափոխություն» բառերը ադրբեջաներեն թարգմանվում են:
Դուք պատկերացրեք, որ ինչ հրճվանք է ունենում Ադրբեջանի նախագահ Ալիևը, երբ այստեղի իշխանությունները ասում են, որ պետք է տեսնեն, թե ինչերի շուրջ են բանակցել նախորդ իշխանությունները և ինչեր են խոստացել:
Ադրբեջանի նախագահը կարող է ասել, թե տեսեք՝ ինչ բանակցող եմ ես եղել, ուր եմ հասել և ինչեր եմ պոկել Հայաստանից: Իսկ գիտեք, թե դա ինչ դուխ կամ դուխով գլխարկ է տալիս Ադրբեջանի զինվորականներին»,- ասաց նա՝ նշելով, որ այդ հարցում ինքը շարունակելու է այսօրվա իշխանություններին քննադատել:
Նիկոլ Փաշինյանը, ըստ նրա, կարող էր գնալ Ղարաբաղ կամ Բակո Սահակյանին կանչեր Հայաստան, այստեղ վիճեին, ինչքան ուզում էին: «Թող հեռախոսով վիճեն, ինչքան ուզում են, բայց այդ խնդիրները չհանեն հանրային մակարդակ: Նստեն, ընդհանուր եզրեր գտնեն»,- ասաց նա:
Մանրամասները՝ տեսանյութում:
