ՀՀ առողջապահության նախարար Արսեն Թորոսյանը հույս է հայտնել, որ ԱԺ–ն այս տարվա ամռանը կքննարկի հակածխախոտային օրինագիծը։ «Վերջին փոփոխություններն ուղարկվել են կառավարություն։ Երբ հարցը ներառվի կառավարության նիստի օրակարգ, դուք այդ մասին կիմանաք», – երեքշաբթի ասաց Թորոսյանը լրագրողներին։
Նախարարի խոսքով, ընդունումից 2–3 շաբաթ անց օրինագիծն արդեն կուղարկվի խորհրդարան։ Պատասխանելով այն հարցին, թե օրինագիծն, արդյոք, վայելու՞մ է քաղաքական աջակցություն` Թորոսյանը հայտարարեց, որ նա ունի ապացուցողական աջակցություն, որը պետք է լինի ավելի կարևոր, քան քաղաքականը։
Նախարարը տեղեկացրեց, որ օրինագծով նախատեսված չեն ծխելու համար տուգանքներ, որոնց չափը գերազանցում է 50 հազար դրամ քաղաքացիների և 200 հազար դրամ կազմակերպությունների համար, սակայն միաժամանակ ընդգծել է, որ այդ տուգանքները սահմանվել են խախտումները կանխելու համար և նպատակ չունեն վճարումներ ստանալ խախտումների փաստով։
«Ինչ վերաբերում է նարգիլեին, ապա այն ավելի վնասակար է, քան սովորական ծխախոտը։ Ավելին, նարգիլեի միջոցով կարող են փոխանցվել տարբեր վարակիչ հիվանդություններ», – ասաց Թորոսյանը։
Հակածխախոտային օրինագիծը նախատեսում է միջոցառումների խստացում ծխելու դեմ պայքարում` ծխախոտային տարատեսակ արտադրանքի և դրանց փոխարինողների օգտագործումը կանխելու և դադարեցնելու նպատակով երկրորդային ծխի ազդեցության բացասական հետևանքներից բնակչությանը պաշտպանելու համար։
Սակայն չափազանց բարձր տուգանքների պատճառով հանրության վրդովմունքի արդյունքում օրենքի վերջնական քննարկումն ու ընդունումը հետաձգվել է, իսկ օրինագիծն ուղարկվել է լրամշակման։
